Samningur vegna útgöngu Bretlands úr Evrópska efnahagssvæðinu var undirritaður af utanríkisráðherrum Noregs, Liechtenstein og Íslands ásamt útgöngumálaráðherra Bretlands þann 28. janúar. Samningurinn leysir úr viðeigandi útgönguskilmálum með sambærilegum hætti og gert er í útgöngusamningi Bretlands og ESB. Þar á meðal er fjallað um ýmis mál á sviði hugverkaréttinda.

Fyrst um sinn verða engar breytingar á sambandi Íslands við Bretland þar sem aðlögunartímabil tekur gildi til loka 2020.

Á meðan á aðlögunartímabilinu stendur munu Evrópuvörumerki (e. European Union trade mark - EUTM) enn vera í gildi í Bretlandi en fjölmörg íslensk fyrirtæki eiga slík merki skráð.

Að loknu aðlögunartímabilinu mun u.þ.b. 1,4 milljónum Evrópuvörmerkja verða breytt í sambærilegar breskar vörumerkjaskráningar. Þessar breytingar taka því gildi 1. janúar 2021. Útganga Breta mun ekki hafa áhrif á vörumerki íslenskra fyrirtækja sem eru skráð beint hjá Bresku Hugverkastofunni (UKIPO).
Það sama á við um skráða ESB hönnun í eigu íslenskra fyrirtækja (e. Registered Community Design – RCD) Slíkar skráningar halda gildi sínu á aðlögunartímabilinu en þann 1. janúar 2021 mun þeim verða breytt í sambærilegar breskar hönnunarskráningar.

Ekki er fyrirséð að útganga Breta muni hafa áhrif á skráningu og gildi einkaleyfa íslenskra fyrirtækja í Bretlandi þar sem útgangan hefur ekki áhrif á  Evrópska einkaleyfasamninginn sem bæði Ísland og Bretar eru aðilar að.  

Þá var í samningi EES-EFTA ríkjanna samið enn fremur samið um gagnkvæma vernd afurðarheita á aðlögunartímabilinu, vernd gagnagrunna og tæmingu vörumerkjaréttar.

Hugverkaréttindi verða mikilvægur hluti af samningaviðræðum milli Bretlands og Evrópusambandins sem munu eiga sér stað á aðlögunartímabili sem er nú að hefjast. Samhliða þessum viðræðum mun Ísland og Bretland eiga viðræður um framtíðarsamskipti ríkjanna, þ.á.m. á sviði hugverkaréttinda.
Samkvæmt utanríkisráðuneytinu er nú verið er að skoða möguleika á samstarfi EFTA-ríkjanna innan EES þar sem það á við og samræmist hagsmunum ríkjanna. Mikill vilji ríkir í Bretlandi og á Íslandi til að tryggja áfram náin tengsl og hagstæð viðskipti ríkjanna.

Í hnotskurn:

  • Evrópuvörumerki íslenskra aðila munu vera í gildi í Bretlandi á meðan aðlögunartímabilinu stendur, til 31. desember 2020. Það sama á við um skráða ESB hönnun í eigu íslenskra aðila.
  • Að aðlögunartímabilinu loknu munu Evrópuvörumerkjum verða breytt í sambærilegar breskar vörumerkjaskráningar. Þessi breyting mun taka gildi 1. janúar 2021. Það sama á við um skráða ESB hönnun sem verður breytt í sambærilegar breskar hönnunarskráningar.
  • Útganga Breta mun ekki hafa áhrif á skráningu og gildi einkaleyfa íslenskra aðila sem eru í gildi í Bretlandi.
Image
Mynd
Jón Gunnarsson

Jón Gunnarsson

Position
Samskiptastjóri
Phone
5809405
E-Mail
@email