Einkaleyfisumsóknum íslenskra aðila fækkaði um tæp 30% á fyrstu níu mánuðum ársins 2021 samanborið við sama tímabil árið 2020. Staðfestum evrópskum einkaleyfum sem hér taka gildi fækkar um 5,7% milli ára. Þetta kemur fram í nýrri tölfræði Hugverkastofunnar.

  • Vörumerkjaumsóknum fjölgaði lítillega á fyrsta níu mánuðum ársins (3.048) samanborið við sama tímabil í fyrra (3.027). 
  • Vörumerkjabirtingum fækkaði um 42% milli ára.
  • Staðfestum evrópskum einkaleyfum fækkaði um 5,7% milli ára.
  • Umsóknum um landsbundin einkaleyfi fækkaði um 29,7% á milli ára. 

Vörumerki

Hugverkastofunni barst í heild 3.048 umsóknir um skráningu vörumerkis á tímabilinu janúar til september á árinu. Þetta er aukning um tæpt 1% en 3.027 umsóknir bárust á sama tímabili í fyrra. Mestu munaði um aukningu á fjölda landsbundinna umsókna frá erlendum aðilum en þeim fjölgaði um 6% milli ára. 445 umsóknir bárust frá erlendum aðilum á tímabilinu janúar til september samanborið við 425 á sama tímabili í fyrra. Vörumerkjaumsóknum íslenskra aðila, sem fjölgaði í fyrra um 5,2% þrátt fyrir neikvæð efnahagsleg áhrif af COVID-19 faraldrinum, fækkar nú um 4% milli ára.

Alþjóðlegum vörumerkjaumsóknum fjölgar um tæpt 1% milli ára (2.087 árið 2020 og 2.105 árið 2021).

Á tímabilinu janúar til september voru birt samtals 1.810 vörumerki og er það fækkun um 42% frá fyrra ári. Mestu munar þar um birtingar á alþjóðlegum umsóknum sem fækkaði úr 2.411 í 1.090, eða um 54,7%. Birtingum á vörumerkjum íslenskra aðila fjölgaði um 11,6%, 326 vörumerki voru birt á fyrstu níu mánuðum ársins 2021 samanborið við 292 á sama tímabili árið 2020. Birtingum vörumerkja erlendra aðila fækkaði um 2,4%, 404 vörumerki voru birt á tímabilinu janúar til september árið 2020 samanborið við 394 árið 2021.

Fækkun á birtingum vörumerkja skýrist fyrst og fremst af breyttri forgangsröðun verkefna, en á árinu 2020 var mikil áhersla lögð á rannsókn vörumerkja en í upphafi þessa árs hefur vinna við rökstuðning fyrri ákvarðana verið fyrirferðarmikil.

Einkaleyfi

Umsóknir um landsbundin einkaleyfi á fyrstu níu mánuðum ársins 2021 eru töluvert færri en á sama tímabili síðustu ár, eða 26 talsins. Er þetta fækkun um tæplega 30% milli ára, en á sama tímabili árið 2020 höfðu 37 einkaleyfaumsóknir borist Hugverkastofunni. Alþjóðlegar umsóknir (PCT umsóknir), þar sem íslenskir aðilar sækja um hjá Alþjóðahugverkastofunni, voru 10 á sama tímabili. Það er töluverð fækkun frá sama tímabili í fyrra þegar metfjöldi PCT umsókna var lagður inn, eða 19 talsins.

Það sem af er ári hafa um 5,7% færri evrópsk einkaleyfi tekið gildi hér en á sama tíma í fyrra. 1.040 evrópsk einkaleyfi voru staðfest hér á landi á fyrstu níu mánuðum ársins samanborið við 1.103 á sama tímabili í fyrra.

Er þetta áframhald frá þróun síðasta árs en þá fækkaði lítillega staðfestum evrópskum einkaleyfum samanborið við fyrra ár. Var það í fyrsta skipti frá því Ísland gerðist aðili að evrópska einkaleyfasamningnum sem fækkun varð á fjölda staðfestra einkaleyfa milli ára.

Image
Mynd
Jón Gunnarsson

Jón Gunnarsson

Position
Samskiptastjóri
Phone
5809405
E-Mail
@email