Mikil aukning var á fjölda vörumerkjaskráninga fyrstu níu mánuði ársins miðað við síðustu tvö ár samkvæmt nýrri tölfræði Hugverkastofunnar.

  • Fjöldi vörumerkjaskráninga jókst um 56% á tímabilinu janúar til september á þessu ári (3.142) samanborið við sama tímabil árið 2019 (2.004).
  • Alþjóðlegar vörumerkjaskráningar fyrstu níu mánuði ársins (2.404) voru fleiri en allt árið 2019 (1.783).
  • Fjöldi alþjóðlegra PCT einkaleyfaumsókna jókst mikið milli ára. 19 umsóknir bárust á tímabilinu janúar til september á þessu ári, sem er meira en allt árið 2019 (18).
  • Fjöldi vörumerkjaumsókna íslenskra aðila fyrstu níu mánuði ársins jókst um 5% milli ára (520 í ár en 495 árið 2019) en fjöldi alþjóðlegra vörumerkjaumsókna dróst saman um 6% (2.073 í ár en 2.210 árið 2019).  
  • Fjöldi staðfestra evrópskra einkaleyfa á tímabilinu janúar til september dróst saman um 3,5% milli ára (1.095 í ár miðað við 1.135 árið 2019).

Vörumerki

Mikil aukning var á fjölda vörumerkjaskráninga milli ára. Samtals voru 3.142 vörumerki skráð hér á landi fyrstu níu mánuði ársins samanborið við 2.004 árið 2019 og 2.133 árið 2018.  Fjöldi landsbundinna vörumerkjaskráninga íslenskra aðila dróst lítillega saman (-1%) en jókst hjá erlendum aðilum (17%). Á sama tíma jókst fjöldi alþjóðlegra vörumerkjaskráninga um 81%. Þessi mikla aukning kemur til vegna átaks í rannsókn vörumerkja sem hófst í byrjun árs og gera áætlanir ráð fyrir að á árinu verði rannsökuð um 4.500 vörumerki samanborið við 3.000 árið 2019. Mikil fjarvinna starfsmanna Hugverkastofunnar vegna COVID19 faraldursins hafði engan neikvæð áhrif á afköst í rannsókn, nema síður sé og hafa nú verið rannsökuð 5% fleiri vörumerki en áætlað var í byrjun árs.

Heildarfjöldi vörumerkjaumsókna fyrstu níu mánuði ársins (3.013) dróst lítillega saman á milli ára, eða um tæp 4%. Fjöldi umsókna íslenskra aðila jókst um 5% á tímabilinu samanborið við árið á undan og er það sérstaklega áhugavert í ljósi neikvæðra efnahagslegra áhrifa af COVID-19 faraldrinum. 

Einkaleyfi

Fjöldi staðfestra evrópskra einkaleyfa hjá Hugverkastofunni lækkaði lítillega fyrstu níu mánuði ársins miðað við árið á undan. Á tímabilinu janúar til september voru 1.095 evrópsk einkaleyfi staðfest hér á landi samanborið við 1.135 árið 2019, sem er samdráttur um 3,5%.

Fjöldi einkaleyfisumsókna sem lagðar voru inn hjá Hugverkastofunni á tímabilinu janúar til september (35) var lægri en á sama tímabili árið 2019 (53) og 2018 (56). Hins vegar fjölgaði alþjóðlegum PCT einkaleyfaumsóknum íslenskra aðila en þær voru 19 fyrstu níu mánuði ársins samanborið við 11 á sama tímabili árið 2019.

Image
Mynd
Jón Gunnarsson

Jón Gunnarsson

Position
Samskiptastjóri
Phone
5809405
E-Mail
@email