Ný stefna Hugverkastofunnar - framúrskarandi þjónusta, fagleg deigla og frábær vinnustaður

Hugverkastofan hefur sett sér nýja stefnu til ársins 2028. Samkvæmt henni er hlutverk stofnunarinnar að fara með málefni hugverka á Íslandi, miðla þekkingu og vera í virku samtali við samfélagið um málefni sem tengjast hugverkarétti. Skilgreind gildi stofnunarinnar sem móta munu starfið framundan eru: fagleg, samstillt og framsækin. Á grunni þessara gilda eru sett fram þrjú meginmarkmið sem tengjast heimsmarkmiðum Sameinuðu þjóðanna um góða atvinnu og hagvöxt og nýsköpun og uppbyggingu:

• að veita framúrskarandi þjónustu,
• að vera fagleg deigla,
• að vera frábær vinnustaður

Samhliða nýrri stefnu hefur skipuriti stofnunarinnar verið breytt og sviðum fækkað niður í tvö: rekstrarsvið og hugverka- og stjórnsýslusvið. Markmið skipulagsbreytinganna er m.a. að einfalda skipulag og auka teymisstarf, skýra verkaskiptingu og verkferla. Teymi hafa verið skipulögð í kringum lykilferla stofnunarinnar og meðferð, umsýsla og afgreiðsla umsókna um skráningu hugverkaréttinda verða öll innan eins sviðs.

Framtíðarsýnin er að Hugverkastofan sé þekkingarmiðstöð hugverkaréttinda í hugverkadrifnu samfélagi og sterkur hlekkur í keðju nýsköpunar og atvinnulífs.

Arnar Pálsson hjá Arcur og Herdís Haraldsdóttir hjá Irpa stýrðu stefnumótunarvinnunni í samstarfi við stjórnendur og starfsfólk Hugverkastofunnar.

Nýja stefnu Hugverkastofunnar má nálgast hér.