Sólveig Ingólfsdóttir nýr sviðsstjóri faggildingarsviðs Hugverkastofunnar

Sólveig Ingólfsdóttir hefur verið ráðin sviðsstjóri faggildingarsviðs Hugverkastofunnar. Hún kemur frá sænsku faggildingarstofunni Swedac þar sem hún hefur undanfarin sex ár m.a. stýrt úttektum á faggiltum stjórnunarkerfum.

Auk þess að leiða faggildingarsviðið og starfa sem úttektaraðili mun Sólveig vinna við uppbyggingu faggildingar á Íslandi í samstarfi við starfsmenn sviðsins, stjórnvöld og aðra hagsmunaaðila.

Sólveig hefur yfir þrjátíu ára reynslu af stjórnun gæðamála, lengst af hjá einkafyrirtækjum í Svíþjóð, m.a. hjá Arla Foods 1999-2018. Áður en hún flutti til Svíþjóðar starfaði hún sem gæðastjóri og verkefnastjóri í þróunarverkefnum, m.a. hjá Viking bruggi og Rannsóknarstofnun fiskiðnaðarins. Sólveig lauk meistaragráðu í matvælafræði frá Háskóla Íslands árið 1996.

Faggildingarsvið er faglega sjálfstætt svið innan Hugverkastofunnar sem heyrir undir menningar- og viðskiptaráðuneytið. Það er hinn opinberi faggildingaraðili á Íslandi og veitir faggildingu fyrir skoðunarstofur, prófunarstofur, kvörðunarstofur og vottunarstofur og er ábyrgt fyrir viðhaldi, breytingum á umfangi, tímabundinni niðurfellingu og afturköllun faggildingar í samræmi við viðeigandi staðla, lög og reglugerðir.