Aldrei fleiri umsóknir um einkaleyfi og skráningu á vörumerkjum og hönnun í heiminum

Þrátt fyrir Covid faraldur hafa umsóknir um einkaleyfi, vörumerki og hönnun aldrei verið fleiri í heiminum en í fyrra, samkvæmt fréttatilkynningu frá Alþjóðahugverkastofnuninni (WIPO – World Intellectual Property Organization).

Heildarfjöldi einkaleyfisumsókna í heiminum árið 2021 var um 3,4 milljónir, sem er 3,6% aukning frá fyrra ári. Mest varð aukningin í Asíu en hugverkastofur í Asíu tóku við um 68% allra umsókna um einkaleyfi í heiminum fyrra. Einkaleyfisumsóknum fjölgaði um 5,5% milli ára í Kína, 5,5% í Indlandi og 2,5% í S-Kóreu. Á sama tíma fækkaði umsóknum um 1,2% milli ára í Bandaríkjunum, um 1,7% í Japan og 3,9% í Þýskalandi. Kína á nú í fyrsta skipti fleiri virk einkaleyfi en Bandaríkin eða 3,6 milljónir einkaleyfa á móti 3,3 milljónum.

Flestar alþjóðlegar PCT einkaleyfaumsóknir eru frá hinu kínverska Huawei Technologies, næstflestar frá bandaríska fyrirtækinu Qualcomm Incorporated og þriðju flestar frá hinu s-kóreaska Samsung.

Umsóknum um skráningu vörumerkja fjölgaði líka víðast hvar í heiminum og í heildina um 5,5% frá árinu 2020. Umsóknum um skráningu á hönnun fjölgaði um 9,2%, mest vegna mikillar fjölgunar umsókna í Asíu.