Hádegiserindi á Ísafirði

Eiríkur Sigurðsson, samskiptastjóri Hugverkastofunnar og Jón Gunnar Guðmundsson, verkefnisstjóri hjá Kerecis, héldu hádegiserindi hjá Vestfjarðastofu á Ísafirði í dag um hugverkaréttindi í nýsköpun og rekstri, í samstarfi við Vestfjarðastofu og Fræðslumiðstöð Vestfjarða. Ágætlega var mætt á fundinn og líflegar umræður spunnust eftir erindin um mikilvægi hugverkaréttinda.

Saga Kerecis, sem um 50 manns starfa hjá á Ísafirði og 450 um allan heim, er einmitt mjög gott dæmi um hversu mikilvægt það er fyrir nýsköpunarfyrirtæki að leggja áherslu á öfluga vernd hugverka sinna með einkaleyfum og vörumerkjaskráningum. Samkvæmt kynningu Jóns Gunnars á Kerecis nú um 80 einkaleyfi í um 40 löndum.